ಅವಳನ್ನರಸಿ !

ಹೊರಟಿರುವೆ ನಾ ಅವಳನ್ನರಸಿ
ಈ ನನ್ನ ಜೀವನಕ್ಕೆ ಅವಳೇ ನನ್ನರಸಿ
ಕೈಗೆ ಸಿಗದ ತಾರಸಿ
ಕಣ್ಣಿಗೆ ಕಾಣದ ಷೋಡಶಿ
ನನ್ನಂತವನ ಶಿಕ್ಷಿಸಿ
ನಿದ್ದೆ ಕಳೆಯುವ ರಾಕ್ಷಸಿ

ಹೊರಟಿರುವೆ ನಾ ಅವಳನ್ನರಸಿ
ಪಾಲಿಗೆ ಬರುವುದನ್ನಾದರೂ ಬಯಸಿ
ಪದವಿಯ ಪೂರ್ಣಗೊಳಿಸಿ
ಪಯಣಕೆ ಪಣವಿರಿಸಿ
ಪಲಾಯನಕೆ ತಡೆ ಇರಿಸಿ
ಪ್ರತಿಷ್ಠೆಯ ಬೆನ್ನರಸಿ

ಹೊರಟಿರುವೆ ನಾ ಅವಳನ್ನರಸಿ
ಹೆತ್ತವರ ಹೆಗಲ ಭಾರವನು ಇಳಿಸಿ
ಮತ್ತಾರೂ ಅಲ್ಲ ಪ್ರೇಯಸಿ
'ನೌಕರಿ' ಎಂಬ ಅರಸಿ
ಅರ್ಹತೆಯಿಂದ ಆರಿಸಿ
ನನ್ನದಾಗಿಸಿಕೊಳ್ಳ ಬಯಸಿ

ಹೊರಟಿರುವೆ ನಾ ಅವಳನ್ನರಸಿ
ಆಪ್ತರಾಗಿ ಸಹಕರಿಸಿ
ತಮಗೆಲ್ಲಾದರು ತಿಳಿದಿದ್ದರೆ
ದಯವಿಟ್ಟು ತಿಳಿಸಿ
ಬಾಳುವೆ ಈ ಬಾಳ
ನಿಮ್ಮ ಋಣವಾಗಿರಿಸಿ